ლინგვისტუსის ბლოგი

ეს ქალი, ერინ მაკკინი მგონი ჩემს აზრებს კითხულობს, უფრო სწორად შეიძლება მე წავიკითხე მისი აზრები სადღაც პარალელურ სამყაროში (ჩჟუანცზის და პეპლის ისტორია ხომ გახსოვთ?!), თუმცა ფაქტია რომ ის, რასაც იგი “ახალი იდეების” გრიფით აჟღერებს, ჩემთვის არ იყო ახალი და უკვე ნაფიქრი მქონდა, ან სადღაც წაკითხული და ამავდროულად მისი მანერა ლექსიკოგრაფთა ერთი შეხედვით მოსაწყენ და უინტერესო რუტინას შეხედოს როგორც თავშესაქცევ საქმიანობას, ძალიან მხიბლავს.

მეტაფორასაც არა უშავდა, თავის თავს რომ მებადურს უწოდებს, ყოველ დღე სიტყვების ზღვაში რომ გადის და თევზაობს. “ცუდი” სიტყვების რეაბილიტაციის მცდელობაც და ვიქტორიანული მორალის, რომელიც დღემდე შემორჩენილია თანამედროვე ინგლისურენოვან ლექსიკონებში, კრიტიკაც ერთობ სახალისო იყო. ერთი სიტყვით ამ ქალის ყურებითა და მოსმენით ძლიერ ვისიამოვნე, ჰოდა იდოს აქ ეს ბმული, კიდევ ვუყურებ ცუდ ხასიათზე როცა ვიქნები.

არის ერთი ბრიტანელი ხელოვანი მაიკ ბალაკოვი, რომელიც გატაცებულია ლეგოს სათამაშოებით. გარდა იმისა, რომ Star Wars-ის თავგადაკლული ფანია, იგი ამავდროულად ჭეშმარიტი ფოტოხელოვანია. ძალიან დიდი სიამოვნება მივიღე მისი ფოტოების სერიით Classics in Lego, სადაც აღებულია ძალზედ გახმაურებული ფოტოები და მათი ინტერპრეტაციაა წარმოდგენილი ლეგოს სათამაშოების გამოყენებით. ერთი სიტყვით ნამუშევრებს შეგიძლიათ ამ ბმულზე გაეცნოთ.

დღეს წარმოგიდგენთ ამერიკელ კარიკატურისტს, შენონ უილერს და მის კომიქსების ჟურნალს “Too Much Coffee Man”. ეს ადამიანი ძალიან მრავალი იუმორისტული და ამავდროულად ნაღვლიანი კარიკატურისა და ჩანახატის ავტორია. სულ რომ არაფერი დაეხატა მას გარდა “ადამიანის სიცოცხლისა”, მაინც დასაფასებელი შემოქმედი იქნებოდა. ძალიან ძნელია ასეთი განსხვავებული ფორმით, იუმორითა და ამავდროულად ტრაგიზმით აღწერო ადამიანის ცხოვრება. დანარჩენ მის ნამუშევრებს შეგიძლიათ მის გვერდზე გაეცნოთ.

http://www.tmcm.com/

ბლოგერობა იმიტომ მომწონს, რომ არ ვარ ჩაკეტილი თემატიკაში, არც ფორმაში, შესაბამისად შემიძლია ვწერო, იმაზე რაც გამიხარდება და თუკი ჩემს გვერდზე შემოდიან, ე.ი. ტყუილად არ ვწვალობ. ვიმედოვნებ, რომ ტყუილად არ ვწვალობ, შესაბამისად დღეიდან ერთ სიახლეს შემოგთავაზებთ: შევეცდები წარმოგიდგინოთ ყველა ის ვებ–გვერდი, ან ვებ–პროექტი, რომელიც ჩემს ყურადღებას მიიპყრობს. იქნებ ვინმეს რამეში გამოადგეს ჩემი აღმოჩენები ინტერნეტის სამყაროში.

დღეს წარმოგიდგენთ http://www.sixtysymbols.com–ს. პროექტი ჯერ დასრულებული არ არის, რაზედაც წარმოგენილ სნეპ–შოტზე არსებული კითხვის ნიშნები მოწმობს. ის ეძღვნება ფიზიკასა და ასტრონომიაში ყველაზე გავრცელებულ 60 სიმბოლოს. შეგიძლიათ თითოეულ სიმბოლოს დააკლიკოთ და უყუროთ პატარა ვიდეო–ჩანახატს თქვენთვის საინტერესო სიმბოლოს შესახებ, სადაც ხალისითა და იუმორით ცდილობენ ამა თუ იმ ცნებისა თუ სიმბოლოს შინაარსის მსმენელამდე მიტანას ნოტინგჰემის უნივერსიტეტის პროფესორები.

ყველაზე მეტად ვიდეო–ჩანახატებში ამ ადამიანების უბრალოებამ მომხიბლა, ყოველგვარი ზედმეტი სამეცნიერო რიტორიკისა და სნობიზმის გარეშე ცდილობენ ისინი ახსნან სათქმელი, ამავდროულად რაც შეიძლება თვალსაჩინოდ. დაახლოებით ისე, როგორც 10 წლის ბავშვს უნდა აუხსნა, როდესაც ის გკითხავს: “მამა, რა არის ენერგია?” ჰოდა, თუ რომელიმე სიმბოლო გაინტერესებთ და ინგლისური იცით, შეგიძლიათ დაუფასოთ შრომა ნოტინგჰემის უნივერსიტეტის შემოქმედებით ჯგუფს.