ლინგვისტუსის ბლოგი

აი, ეს წიგნის თარო მინდა. დავალაგებდი ჩემს “ხელშეუხებელ სექციას”, საიდანაც უცხო ან ნაცნობ პირებზე წიგნების თხოვება და გასხვისება მისი უდიდებულესობა, ლინგვისტუსის კანონმდებლობითაა აკრძალული. ჰოდა, ასი წლის შემდეგ ეს ჩინებული კონსტრუქცია, რომელიც იმედი მაქვს რომ მუხისგანაა გაკეთებული, საბოლოო დახმარებას და სამსახურს გამიწევდა. მისი დიზაინი უილიამ უორენმა შექმნა 2005 წელს და მას “Shelves for life” უწოდა. მათ, ვისაც აინტერესებს თუ რაში გამოიხატება ამ წიგნების თაროს უჩვეულოობა და რითი განსხვავდება ის, მისი მსგავსებისაგან, გადავდივართ ამ ბმულზე და ვნახულობთ, თუ რისი მიღება შეიძლება თუკი, თაროს დავშლით და ამ ნახაზებით ვიხელმძღვანელებთ.

თსუ–ს ჩემპიონატის ფინალურ პაკეტში რაგბიში არგენტინა–ინგლისის დაპირისპირებაზე იყო შეკითხვა, სადაც ინგლისელებმა მატჩის პოსტერზე არგენტინის დროშაზე არსებულ მზეს მათი მშობლიური ღრუბელი მიახატეს, ამით ხაზი გაუსვეს რა იმას, რომ ინგლისური ღრუბელი არგენტინის მზეს დაჩრდილავდა. ამ შეკითხვას დიდი მითქმა–მოთქმა მოჰყვა, რის გამოც დიზაინერთა კიდევ ერთ ჭიდილს გავეცანი საფეხბურთო ქომაგობის ფონზე. არგენტინა–ბრაზილიის ურთიერთაპირისპირებაზე მაქვს საუბარი, სადაც არგენტინელებმა დაბეჭდეს პოსტერი (იხილეთ ქვემოთ), რაზედაც ბრაზილიელებმა მახვილგონივრული პასუხი გასცეს, მას შემდეგ რაც დაამარცხეს არგენტინელები.

პ. ს. შეიძლება ძველია, მაგრამ მე ძალიან გავერთე…